shadow

سەرتیپ جەوھەر

عەلی عەونی، ئەندامی سەركردایەتی پارتی دیموكراتی كوردستان داوا دەكات ناوی ئەوكەسانە تۆماربكرێت كە دەنگی بەڵێ‌ بەریفراندۆمە ناقانونییەكەی حزبەكەی نادەن، وەك ئەوەی ئەوەی رۆژی حەق و حیساب بێت و وەك سەردەمی بەعس ئەم خەڵكە تەسفیربكەن و وڵات بەدەریان بكەن!

من پێشنیار دەكەم لەبری ناونوسكردنی ئەوانەی دەنگی “بەڵێ‌” بەریفراندۆمە ناقانونییەكەی ئێوە نادەن، ناو و شوێنی ئەو 18 سەربازگەی جەندرمەی تورك لە كوردستان تۆماربكەیت، كە ریفراندۆمەكەی لێ‌ دەكرێت و بۆ خەڵكی وڵاتەكەتی بخەیتە روو! خۆ ئەوەت پێنەكرا، ناونوسی ئەو نەوتفرۆشانە بكە، كە سامانی سروشتیی ووڵاتەكەمان هەرزانفرۆش دەكەن، كەس نازانێت لە كوێی و بەچەندو بەكێی دەفرۆشن و پارەكەی چی بەسەردێت!

خۆ ئەوەشت پێنەكرا، دەتوانێت ناوی ئەو گەندەڵكارانەمان بۆ تۆماربكەیت كە پارەی ووڵاتەكەمان دەدەن بەفیشەو لەقومارخانەكانی قوبرس و لوبنان و توركیا وەك شاباش هەڵیدەدەن، خەڵكی ووڵاتەكەشیان وەك سواڵكەریان لێهاتوەو بەدیار تەلفزیۆن دادەنیشن دوعا دەكەن بەڵكو خوا بكات حوكمڕانەكانی رەحمیان بجوڵێت موچەی مانگێكیان بۆ خەرج بكەن!

كاك عەلی، ئەگەر هەڕشەمان لێدەكەیت بڵێین “نەخێر”و تەسفیرمان دەكەیت، ئەوا نەخێرەكەی سەر كاغەزی ریفراندۆمەكەتان لابدەن، نەبادا ئەو “نەخێرە” ئەوەندەی دیكە هەشبەسەرمانكات، لەبری ناوی ئێمە بنوسیت، بڕۆ ناوی ئەوكەسانە بنوسە كە شنگالیان بۆ داعش جێهێشت و بەهۆیەوە هەزاران ژن و منداڵی وڵاتەكەت كەوتە دەست دڕندەترین بونەوەری ئەم سەرزەمینە، موحاكەمەو موحاسەبەی ئەوانە بكەن و لەیادی ئەو كارەساتەدا كە چەند رۆژێكی دیكەیە ئەو ئیعلانە بكەن.

من نازانم ئەو منەتە چییە بەسەر ئێمەوە دەیكەن؟ ئەوەنییە هەرچی دامودەزگا لەم ووڵاتە هەیە یان ماوەكەی بەسەرچووە یان دەرگاتان داخستوە! من دەزانم ئێوە دەوڵەتێكتان دەوێت كە هاوڵاتیانی بەبەرچاوی خەڵكەوە دەڕفێنرێن و رۆژنامەنوسانی بەبەرچاوی دونیا تێرشەق دەكرێن و گەنجانی لەسەر فوول لایتێك دەدرێتە بەر فیشەك!
كاك عەلی، لەبری تۆماركردنی ڤیدیۆو وێنەی نەخێری ئێمە، چی لەو ڤیدیۆو وێنەو دیكۆمینتانە دەكەیت كەباسی گەندەڵی حوكمڕانییەكەی ئێوە دەكەن، خۆ جاری جارانیش نییە ئێوەی دەسەڵاتدار مێژوو بنوسنەوە. ئێستا گەنجانی ووڵاتەكەت لەمۆبایلەكەیان وێنەو ڤیدیۆو دیكۆمێنتی گەندەڵیی ئەم حوكمڕانییەيان تۆماركردووە، وەك گوڵ بۆ نەوەكانی داهاتووی دەگوێزنەوەو دەگێڕینەوە، نەكا ئێوە شانازیی بەم حوكمڕانییە بكەن.
كاكە عەلی، ئەوەی هاتۆتەدی بەخوێن قوربانیی و شەونخونیی ئێمە بووە، ئێمە سینەزەنی و شینی حەسەن و حوسێنمان نەكردووەو نایكەین، بن سێبەری هەر دارو بەردێكی ووڵاتەكەم جێ شەهیدو خوێنڕژانی ئێمەیە، خۆشبەختانە ناوەكەمان كوردییەكی رەوان و شیرینە، ئێوە ناوەكەتان عەلی (شیعەییە)، ئێمە لە سینەزەنی نازانین..

هەواڵی پەیوەست

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *