shadow

 

لاهور شێخ جەنگی

با تۆمەتبارکردنی یەکێتیی نیشتمانیی کوردستان، کۆتایی بێت. ئەوانەی ئێستا پرسیار لەسەر ئیرادە و ئامانجی یەکێتیی نیشتمانیی دروست دەکەن، ئەوانەی شک دەچێنن، ئەوانەی مەسەلەی دەوڵەتی کوردی لە کات و ناکاتدا دەوروژێنن، و ئەوانەی دەیانەوێت جیاوازیی تێڕوانین، بە گومان و خیانەت بناسێنن، باشدەزانن کە وا 40 ساڵە یەکێتیی نیشتمانیی، پێشڕەوی خەباتی رزگاریی نەتەوەیی و جەنابی مام جەلالیش ئەندازیاری پرۆژەی پیرۆزی داواکردنی مافی چارەی خۆنوسینە.

زیندانەکانی خۆڕاگری، قەنارە و پەتی سێدارە، رێکخستن و شانە نهێنییەکان، گۆڕستانی شەهیدان، داڵدەدانی کوردانی تێکۆشەری پارچەکانی تر، پشتیوانیی راستەقینە لە شۆڕشی رۆژئاوا، و سەنگەرەکانی بەرگریی و هێزەکانی پێشڕەویی ئەمڕۆژانەی بەرامبەر تیرۆر و شۆڤێنییەکان، بە ئاسانی دەیسەلمێنن کە یەکێتیی نیشتمانیی، بە کردەوە خەباتی بۆ دروستکردن و راگەیاندنی سەربەخۆیی و دەوڵەتی کوردستان کردوە و دەنگدەر و لایەنگر و ئەندامانی یەکێتیی نیشتمانییش بە نزیکەی یەک ملیۆن دەنگ، لە دوا هەڵبژاردندا پشتیوانییان لەم یەکێتییە کردوە. ئەوەی یەکێتیی کردە براوەی یەکەمی ناوچە کوردستانییە دابڕێنراوەکان، بێ دودڵی، پشتیوانیی خەڵکی کوردستان و متمانەی ئەوانە بە یەکێتییەک کە هەم دەیانپارێزێت و هەم دەستیان لێ بەرنادا و هەمیش تا سەربەخۆیی پێشڕەویانە. کەواتە با تۆمەتبارکردنی یەکێتیی، بە ناحەق، کۆتایی بێت. چونکە بابەتی سەرەکیی گفتوگۆ ئەوە نییە کە ئایا دەوڵەتی سەربەخۆمان دەوێت، بەڵکو ئەوەیە، کە چۆن دروستی بکەین.

دروستکردنی دەوڵەت، پرۆسەیەکی درێژخایەنی بەردەوامە و قوربانیدان و پشودرێژیی دەوێت. دەوڵەت کاتێک دروست دەکرێت کە نسکۆ نەتوانێت شۆڕشی نەتەوەیەک لەناوبەرێت، ئەو دەمە دەوڵەت رادەیەگەنرێت کە بنەماکانی بەدیهێنرابن و رێچکەکەش بۆ گشت لایەنەکان رونبێت و هەموان تیادا بەشداربن، چونکە دەوڵەت پرۆژەیەکی گشتگیری جەماوەرییە و کاریگەری لەسەر تاک بە تاکی کۆمەڵگە و چرکە بە چرکەی ژیانی تاکەکەکان دروست دەکات و دەبێت هەموان بەرپرسیارێتی و ئەرک و مافیان لەو پرۆسەیەدا دیار و بەرچاو بێت.

کۆدەنگیی نیشتمانیی و زامنکردنی پێداویستییە هەنوکەیی و ناوەندمەوداکان مەرجی سەرەکیین بۆ ئەوەی خۆڕاگریی نەتەوە لەبەرامبەر گوشارە ناوچەیی و نێودەوڵەتییەکان زامن بکەن. ئایا دەسەڵاتی سیاسی و کارگێڕیی هەرێمی کوردستان ئامادەکارییەکانی بەدەوڵەتبونی تا کوێ بردۆتە پێش. ئاو و خۆراکی زیاد لە شەش ملیۆن کەس زامنکراوە، سوتەمەنی و خزمەتگوزارییە مرۆیی و تەندروستییەکان لە چ ئاستێکدان، داهاتی دەوڵەتەکە لە کام سەرچاوە زامندەکرێت و ئێستا سەرمایەی هەرێمی کوردستان چەندە، ئەگەر سنورەکان داخران و نەکرانەوە، سەرچاوەکانی بارزگانی و ئاڵگۆڕ کامانەن. ئایا لەروی ئەمنی و سەربازییەوە، ژێرخانێکی پتەو بۆ سوپا و هەڵوێستێکی یەکگرتوو هەیە بۆ روبەڕووبونەوەی هەڕەشە و مەترسییەکان، و ئایا ئێستا لای هەمو کوردێک زانراوە کێ دۆستە و کێ دوژمنە، تا لەسەر ئەو بنەمایە پەیوەندییەکان رێکبخرێت. ئەی بۆ پێکەوەژیانی ئیقلیمی، کام هەنگاوانە نراون، بەغدا و ئەنکەرە و تاران و دیمەشق و عەمان، چۆن مامەڵە لەگەڵ ئەم دەوڵەتە تازەیە دەکەن، دەوڵەتێک کە بۆ رێڕەوی ئاسمانی و وشکانی، پێویستی بە رەزامەندی ئەوانە، و ئەمنیەت و سەقامگیریشی بە رادەیەکی بەرز پەیوەست دەبێت بە کاردانەوەی ئەوانەوە. دواتر لەسەر ئاستی نێودەوڵەتی، ئایا بۆ زامنکردنی رای ئەندامانی هەمیشەیی ئەنجومەنی ئاسایش کام هەنگاوی پێویست نراوە و یەکێتیی ئەوروپا و کۆمکاری عەرەبی، ئایا چۆن لەم ابابەتە دەڕوانن. دەوڵەت بە کردەوە و وەڵامدانەوەی ئەم پرسیارانە دروست دەبێت.

ئەگەر لەمەش زیاتر بچینە پێش، ئایا سنورەکانی ئەم دەوڵەتە سەربەخۆیەی کوردستان کوێ دەگرێتەوە، ئایا هەموو هەرێمی کوردستان دەگرێتەوە یاخوند زۆنی زەرد و زۆنی سەوز لەیەکتری جیادەبنەوە، ئایا پرۆژەکە هەموو کوردستانی عێراقی لەخۆگرتوە، یان دەخوازرێت کەرکوک بکرێتە هەرێمێکی سەربەخۆی دەرەوەی ئەم دەوڵەتە. بۆ وەڵامی ئەم پرسیارانە، ئایا بەکردەوە چی کراوە و پشتیوان و نەیارەکانی “دەوڵەتی کوردستان”، لەگەڵ کام سنور نەیار و پشتیوانی لەکام دەوڵەتی کوردستان دەکەن. سەرئەنجام پەیوەندی نێوان ئەم دەوڵەتە و کوردانی پارچەکانی تر، چۆن بەرێوەدەبرێت و بەکام ئامانج.

بۆیە ئەگەر دەوڵەتمان ئەوێت، فەرمون با بەکردەوە بنیادی بنێین چونکە دامەزراندی دەوڵەت جیاوازە لە پرۆسەی راپرسی بۆ سەربەخۆیی و جیاوازیشە لە بەکارتکردنی دروستکردنی دەوڵەت.

هەواڵی پەیوەست

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *