shadow


ستران عه‌بدوڵلا‌ ‌

نه‌ورۆزو پیره‌مێردی په‌نده‌كان له‌هه‌قی پیره‌مێردی رۆژنامه‌نووسیان خواردووه‌. خه‌ڵك زیاتر پیره‌مێردی «فه‌رهه‌نگی» ده‌ناسن كه‌ به‌زیندووكردنه‌وه‌ی نه‌ورۆزی دێرین جه‌ژنێكی نه‌ته‌وه‌یی به‌رپاكردو بۆنه‌یه‌كی كۆمه‌ڵایه‌تی‌و شارستانی پێكگه‌یشتنی له‌سلێمانی، یانی له‌كوردستانی باشووردا، ئه‌فراند. له‌سه‌رده‌مێكدا كه‌ شار له‌قۆناغی راگوزه‌ری گه‌شه‌كردندا بوو، ئه‌دگاری سلێمانی نه‌ده‌بووه‌ ئه‌و ئه‌دگاره‌ی ئێستای، كه‌ هه‌موومان له‌به‌رهه‌مه‌كه‌ی ده‌خۆین، ئه‌گه‌ر پیره‌مێردو ده‌سته‌ی یه‌كه‌می مونه‌وه‌ره‌كانی شاره‌ حه‌یاته‌كه‌ ره‌نجی فه‌رهادی وایان نه‌دایه‌ كه‌ پێوه‌ی ده‌ناسرێن.
پیره‌مێرد له‌یاده‌وه‌ریی میللیدا نه‌ورۆزو په‌ندی پیره‌مێردی نه‌سیحه‌تئامێزو شاعیرو پیره‌مێردی زانستییه‌، ته‌نانه‌ت كه‌ وه‌ك پیره‌مێردی رۆژنامه‌ی ژین‌و ژیانیش ناوی دێت، ئه‌وا له‌زهنیه‌تی گشتیدا رۆژنامه‌ ئامرازێكی یارمه‌تیده‌ره‌ له‌چه‌ندین ئامرازی تر بۆ گه‌یاندنی په‌یامی فه‌رهه‌نگی پیره‌مێرد. یانی له‌و ده‌ره‌فه‌تانه‌شدا كه‌ رۆژنامه‌وانیی پیره‌مێرد وه‌ك وێستگه‌یه‌كی گرنگی ره‌وتی ژیانی پیره‌مێرد سه‌یر كراوه‌، ئه‌وا له‌ده‌ره‌وه‌ی ئه‌و تاریفه‌ فه‌رهه‌نگییه‌ رۆژنامه‌ هه‌ر ئامرازێكی ئیفره‌نجییه‌ كه‌ ده‌كرا پیره‌مێرد ده‌سبه‌رداری بێت ئه‌گه‌ر ئامرازی چاكترو كه‌متر (ده‌سته‌بژێری)ی بۆ گه‌یاندنی په‌یامه‌كه‌ هه‌بوایه‌.
له‌سه‌رینی ئه‌مه‌وه‌یه‌ كه‌ ئێژم پیره‌مێرده‌كانی تر له‌به‌شی پیره‌مێردی رۆژنامه‌وانیان خواردووه‌و وه‌ختێتی ته‌جره‌به‌ی ئه‌م رۆژنامه‌نووسه‌ گه‌وره‌یه‌ له‌ناو كۆی ته‌جره‌به‌كانی پیره‌مێرددا وه‌ك یه‌كه‌یه‌كی سه‌ربه‌خۆ جیابكرێته‌وه‌. هیچ نه‌بێ بۆ لێكۆڵینه‌وه‌ی ناو تاقیگه‌ كه‌ زۆرجار بۆ باشتر حاڵی بوون له‌ڕۆڵی توخمێكی دیاریكراو توخمه‌كانی دیكه‌ بێ لایه‌ن یان سڕ ده‌كرێن. ئه‌وه‌ راسته‌ له‌بواری كه‌لتوور وه‌ك دیارده‌یه‌كی ئینسانی زه‌حمه‌ته‌ تاقیكردنه‌وه‌ی موجه‌ره‌دی سڕكردنی توخمه‌ پێكهێنه‌ره‌كان بكرێت، به‌ڵام ئه‌مڕۆ ده‌ركه‌وتووه‌ نه‌ كه‌لتوور وا كایه‌یه‌كی هه‌ڕه‌مه‌كییه‌ ملكه‌چی پێوانه‌كانی زانست نه‌بێ‌و نه‌زانستی موجه‌ره‌دیش له‌كه‌شی ئینسانیی بێبه‌رییه‌.
ته‌جره‌به‌ی رۆژنامه‌وانیی پیره‌مێرد له‌ئه‌دگاری گشتییدا ده‌ریده‌خات كه‌ له‌وێستگه‌ی ئه‌سته‌مبولدا ناوی دره‌وشاوه‌ی پیره‌مێرد بۆیه‌ دره‌وشاوه‌یه‌، چونكه‌ له‌ناو جه‌معی ده‌یان رووناكبیردا ئه‌و رۆژنامه‌وانی یه‌كه‌مه‌، له‌شاعیرێتی قۆناغی سلێمانیدا ناوێكی گه‌وره‌ی زنجیره‌یه‌ك ناوی گه‌وره‌یه‌و كه‌سایه‌تییه‌كی كۆمه‌ڵایه‌تی‌و فه‌رهه‌نگی شارێكه‌ بۆ گه‌وره‌یی خوڵقاوه‌، لێ ئه‌وه‌ی گه‌وره‌كانی تر به‌ئه‌ندازه‌ی ئه‌و نیانه‌و پیره‌مێرد هه‌ی بووه‌، سه‌رمایه‌یه‌كی گه‌وره‌ی ته‌جره‌به‌ی رۆژنامه‌وانییه‌ كه‌ تا مردن ده‌ستبه‌ردانی نه‌بوو، كه‌چی ده‌ستبه‌رداری وه‌زیفه‌ی مه‌ئموریی‌و پۆست‌و ده‌ستبه‌رداری زانستی‌و ته‌نانه‌ت ده‌ستبه‌رداری نه‌ورۆزیش بوو بۆ نه‌وه‌یه‌كی نوێ له‌نه‌ورۆزخوازان. به‌س قه‌ت ده‌ستبه‌رداری رۆژنامه‌وانیی نه‌بوو.
ئه‌وی پێی وایه‌» رۆژنامه‌»ی پیره‌مێرد هه‌ر ئامرازه‌ با سه‌یری داڕشتنی هه‌واڵ‌و راپۆرتی پیره‌مێرد بكات له‌سه‌ر نه‌ورۆزه‌كانی‌و له‌سه‌ر چالاكی زانستی‌و له‌سه‌ر كتێب‌و ژیانی كه‌سایه‌تییه‌كان، ئه‌وجا ده‌زانێت ئه‌و بابه‌تانه‌ ده‌ڵێی كه‌ره‌سته‌ن بۆ جێبه‌جێكردنی ئاره‌زووی به‌تینی رۆژنامه‌وانیی. له‌جێی ئه‌وه‌ی رۆژنامه‌وانیی بۆ ئه‌وه‌ ته‌رخان كردبێت چالاكییه‌كانی پێ بناسێنێت.
ئه‌مانه‌ سه‌ره‌قه‌ڵه‌م بوون، كه‌ ده‌شێ سڵاوێك بێت له‌بۆنه‌ی ئه‌مڕۆی وه‌زاره‌تی رۆشنبیری له‌سه‌ر یادی پیره‌مێردو ده‌شێ بانگه‌وازێكیش بێت بۆ لاكردنه‌وه‌ له‌پیره‌مێرد، رۆژنامه‌وانیی به‌شخوراو له‌لایه‌ن پیره‌مێرده‌كانی تره‌وه‌.

هەواڵی پەیوەست

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *