shadow

ئەنجومەنی ناوەندی یەکێتی نیشتیمانی کوردستان بەبۆنەی ماڵئاوایی نەوشیروان مستەفا رێکخەری گشتی بزوتنەوەی گۆران پەیامێکی بڵاو کردەوە .

جەماوەری کوردستان
هەڤاڵانی یەکێتی نیشتیمانی و بزوتنەوەی گۆران

بەداخ و پەژارەیەکی زۆرەوە سەرلەبەیانی ئەمرۆ 19/5/2017  نەوشیروان مستەفا ئەمین تێکۆشەری گەورەی گەلەکەمان و ئەندامی دەستەی دامەزرێنەری یەکێتی نیشتیمانی کوردستان و رێکخەری گشتی بزوتنەوەی گۆران دڵە گەورەکەی لە لێدان کەوت و ماڵئاوای لە خانەوادە و هاورێ و هاوسەنگەرانی کرد، لە کاتێکدا خۆمان بە خاوەن پرسە دەزانین،  بەناوی سکرتارییەت و سەرجەم ئەندامانی ئەنجومەنی ناوەندییەوە پرسە و ماتەمینی خۆمان رادەگەیەنین و لەخوای گەورە داواکارین گیانی پاکی ئەو تێکۆشەرە مەزنە بەهەشتی بەرینی خۆی شاد بکات.

وەک ئەنجومەنی ناوەندی پشتیوانی و پابەندبوونی خۆمان بە رێککەوتنى سیاسی یەکێتی نیشتیمانی کوردستان و بزوتنەوەی گۆران دوپاتدەکەینەوە و هەوڵەکانیشمان بۆ جێبەجێکردنی بڕگەو مادەکانی رێککەوتنەکە  چڕتردەکەینەوە کە ئەوەش بەدیهاتنی ئاواتێکى هەڤال مام جەلاڵ و  کاک نەوشیروانە  و رۆحی پاکی خوالێخۆشبوو شاد دەبێت ، لە داهاتویشدا هەردولامان هەوڵەکانمان دەخەینەگەڕ بۆ بەدیهێنانی سەرجەم ئاواتە بەدینەهاتوەکانی گەلى کوردستان.

جارێکىتر پرسە و ماتەمنی خۆمان رادەگەیەنین و داوا لە یەزدانی مەزن دەکەین رۆحی پاکی کاک نەوشیروان بە بەهەشتی بەرین شاد بکات،  سەبوری و ئۆقرەیش دڵ و دەرونی بۆ (نما و چیا و چرا) و خانەوادە و هاورێ و هاوسەنگەرانى و ئەندامان و جەماوەری یەکێتی نیشتیمانی کوردستان و بزوتنەوەی گۆران بنێرێت.

هەزاران سڵاو بۆ گیانى پاکى  کاک نەوشیروان و سەرجەم خەباتگێران و شەهیدانى رێگاى رزگارى و ئازادى کورد و کوردستان .
سەر بڵندى و سەر بەرزى بۆ کەس و کارى شەهیدان
سەرکەوتن بۆ گەلى کورد و هێزى پێشمەرگەى کوردستان
انا للـه و انا الیه راجعون

ئەنجومەنی ناوەندی یەکێتی نیشتیمانی کوردستان
19/7/2017

هەواڵی پەیوەست

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *