shadow

عادل موراد بۆ مام جەلال: تۆ نامریت و هەمیشە زیندوویت، بەجەستە لێمان دور کەوتیتەوە بەردەوام لەبیرو هزرو دڵ و رۆحماندای

ماڵئاوا رابەر و هاوڕێی خەبات، ماڵئاوا مام جلال

لەماوەی 45 ساڵی رابردوو من و چەندین رۆڵەی ئەم گەلە وانەو پەندو ئەزموونی زۆر لەم کانیاوە هەڵقوڵاوە لەبن نەهاتوەی شاخە سەرکەشەکانی کوردستان فێربوین، وانە زۆر لەتۆی هاوڕێ و هاوخەبات و براو سەرکردەو رابەرو باوکی رۆحی تێگەیشتین.

ناسنامەیەک بویت بۆ ئاشنابوونمان بەخەباتی رەوای نەتەوەکەمان، خوڕاگریی و ماندونەناسیت لەسەفین و پیرەمەگرون و شاخەسەرکەشەکانی کوردستان چنیبوو.
توانیمان بەچوار کەسەوە بەڕابەریەتی و سەرکردایەتی حەکیمانەت یەکێتیی نیشتمانیی کوردستان دابمەزرێنین کە لەماوەیەکی زۆر کورتدا بوو بە ئومێدو هیوای میللەتێکی ستەم لێکراوی.

بەڵێنت پێ ئەدەین کەبەردەوام بین لەخەبات و درێژە دەری ڕێگەی خەبات و تێکۆشانت بین بەپشت بەستن بە دروشم و هزرو پشتیوانی کۆڕ و کچی شەهیدە سەربەرزەکان و رۆشن فکرو شۆڕشگێڕو زەحمەتکێشانی گەلەکەمان.

تۆ نامریت و هەمیشە زیندوو دەمێنیتەوە، کڵپەو چەخماغەی یەکێتیی ناکوژێتەوەو ڕۆشنایی ئایندەمان و قۆناغەکانی ترمان پێ نیشان ئەدات، بەجەستە لێمان دور کەوتیتەوە بەڵام بەبیرو هۆش و هزو رۆح لەدڵ و دەرونمان دەمێنیتەوە.

چی بڵێم بۆ ماڵئاواییت کەلێرەدا هەموو وشەکان ناتوانن تەعبیر لەهێندەی خۆشەوەیستی نەتەوەو نیشتمان پەروەریت بکەن.
بنوو بە ئارامی ئەی چیا سەرکەشەکەی سەفین، کە دڵە گەورەکەت و لێبوردەیی بێ کۆتایت هەمومانی سەرسام کردبوو، قسە خۆشەکان و بیرۆکەکانت قەد قەد لەیاد ناچن.

تۆ دایمە بۆ من و ئەوانەی تری کەئەیان ناسیت براو رابەرو سەرکردە بویت.
تۆ کەسوکارو خانەوادە بویت بۆ هەموو ئەوانەی کە لەغوربەتدا هاوڕێ و هاوسەنگەرت بوون لەپێناو داکۆکی کردن لەمافی میللەتێکی ستەم لێکراو.
ئومێدم نەدەکرد قەد ئەو ڕۆژە بێت کەناچار بم نامەی ماڵئاواییت تیادا بنوسم، چونکە دەزانم چەند شارەزاییم هەبێت لەچنینەوەی وشەی جوان، هیچ وشەیەک شیاو نابینم تەعبیر لە هێندەی خۆشەویستی و دڵسۆزیت بۆ گەل و نیشتمان.
با زۆر بەڕاشکاوانە پێت بڵێم ئەی هاوڕێی دێرین کەچەند هەست بەغوربەت ئەکەم ئێستا لەدوای کۆچت.
چونکە جێگەت لەدڵ و دەروون و بیر و هۆشم بەئاسانی پر ناکرێتەوە.

ماڵئاوا ئەی هاوڕێی دێرین
ماڵئاوا ئەی برای بەوەفا
ماڵئاوا ئەی هەوێنێ ئاشتی و پێکەوە ژیان
ماڵئاوا ئەی ئومێدی نەوەی نوێ
ماڵئاوا ئەی داکۆکیکەر لەمافی چینی چەوساوە
ماڵئاوا مام جلال

عادل موراد
بەرلین
٢٠١٧/١٠/٣

هەواڵی پەیوەست

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *