shadow

د.به‌ختیارشاوه‌یس‌

جارێکی دیکە، بەهۆی هەڵبژاردنی ئەنجومەنی پارێزگای کەرکوک گرژی کەوتەوە نێوان ئێمەی نوێنەرانی کورد و پەرلەمانتارانی عەرەب‌و تورکمان بەجۆرێک کەلە سەروبەندی چۆڵکردنی هۆڵی پەرلەمان لەلایەن ئێمەوە ، سەرۆکی پەرلەمان لەبریاری دەسپێکردن بەدەنگدان بەپرۆژە یاسای هەڵبژاردنی ئەنجومەنی پارێزگاکان پاشگەزبویەوە و مەسەلەکەی هەڵگرت بۆ کاتێکی تر بەشێوەیەک کە تەوافوقی سیاسی نێوان پێکهاتەکانی شارەکەی لەگەڵدابێت و سەقفێکی زەمەنی بۆ چارەسەرکردنی کێشەکە دیاریکرد.

دروستکردنی ئاستەنگ و گرێوگۆڵە بۆ کەرکوک لەلایەن پێکهاتەی عەرەبی و تورکمانی ناو سنوری ئیداری پارێزگاکە شتێکی تازە نییەو هەربەنەتها لەم جوغزەدا قەتیس نەبوە، بەڵکو لەبەغدایشەوە بەردەوام پیلانی سیاسی و ئیداری و بریاری نا دەستووریی و نایاسایی و تەریک کردنی کەرکوک و کەرکوکیەکان بەشێکی دانەبراو بوە لە سیاسەتی حکومەتە یەک لەدوایەکەکانی پایتەخت و سەرەنجامی ئەمەش ئەو حاڵەتە نەخوازراوە ناواقعی و نایاسایی و نا دیموکراتیانەی لێکەوتوەتەوە کە لەدوای سێ‌ خولی هەڵبژاردن تازە بەتازە ململانێ‌ بکرێت لەسەر ئەنجامدان یان ئەنجامنەدانی هەڵبژاردن ، کە دەرکەوت لەمەیاندا پێکهاتەی عەرەب و تورکمانی سیاسی یاریەکەیان لەبەرژەوەندی خۆیان بەباشی ئەنجامداوە.

دروستکردنی پاساوی ناواقعی وەک یاسای تایبەت بەهەڵبژاردنی کەرکوک، یان بێمتمانەبون بەمەسەلەی سەرژمێری شارەکەو میکانیزمەکانی هەڵبژاردن، یان دواخستنی هەڵبژاردن بەهەر بیانویەک بێت، روون و ئاشکرا مەرامی سیاسی لەپشتەوەیەو دەکرێ‌ دەستی لایەنی دەرەکیش لەم مەسەلەیەدا ببینرێت. ئەگەر نا کەرکوک کە بریارە وەک باقی پارێزگاکانی دیکە عیراقی بێت ، دەبێت بەهەمان یاساو رێسای هەڵبژاردنی بەغداد و نەجەف و بەسرە پرۆسەی هەڵبژاردنی تیا ئەنجامبدرێت و جیانەکرێتەوە. هەروەها ئەگەر بیانوەکە مەسەلەی سەرژمێریە دەبێت ئەوانەی کەلەپەرلەمانن و ئەندامیەتی ئەنجومەنی نوێنەرانیان دەستکەوتوە بیرلەوەبکەنەوە کە ئەو شەرعیەتەیان بەهەمان داواکاری خۆیان دەکەوێتە ژێر پرسیارەوە ، چونکە خۆیان بەهەمان سەرژمێری و داتا و لەرێکارە یاساییەکانی هەمان کۆمسیۆنەوە بونەتە پەرلەمانتار. هەروەها ئەگەر مەسەلەکە دۆخی ئەمنی و ناسەقامگیری و برو بیانووی لەوشێوەیە بێت ، ئەوا دەبێت هەموو لایەک بزانن کە لەدوای هاتنی داعشەوە رەوشی ئەمنی و سەقامگیری پارێزگای کەرکوک بەسەدانجار باشتر بوە لە موسڵ و ئەنبار و دیالی و سەلاحەدین، لەمەش زیاتر و بەئێستاشەوە کەرکوک باوەشی دایکانەی بۆ نزیکەی 250 هەزار ئاوارەی ناوچەکانی دیکەی عیراق کردوەتەوە.

گرتنەبەری سیاسەتی دووفاقی بەرامبەر بە کەرکوک و مەسەلەگرنگەکانی تایبەت بەم پارێزگایە ، بەوەی کە لەدەرەوەی هۆڵی پەرلەمان شتێک بڵێیت و لەناو هۆڵەکە بۆموزایەدەی سیاسی و بۆ کۆکردنەوەی دەنگی پێشوەختی هەڵبژاردن و بۆ خۆشکردنی دڵی ئەجێندای دەرەکی نەک خزمەت بەکەرکوک ناکات ، بەڵکو دەبێتە هەوێنی زیاتر توندکردنەوەی گرێ سیاسی و دەستووری و یاساییەکان و هێندەی دیکە بێمتمانەیی نێوان پێکهاتەکانی لێدەکەوێتەوە کەلەمەشدا بەرلەهەر کەس و شوێنێک کەرکوک و کەرکوکیەکان لەئایندەدا باجەکەی دەدەن.

ئەوانەی کە فرمێسکی تیمساحی بۆ ئایندەی دیموکراسی و داهاتووی هەڵبژاردن و پرۆسێسی دەساودەستکردنی دەسەڵات دەخوازن ، پێویستە گفتار و کرداریان وەک یەک لێبکەن و بگەرێنەوە بۆ پرەنسیپی تەوافوق، بەتایبەتی لەم هەلومەرجە هەستیارەدا کە قۆناغی دوای داعشەوە و پارێزگای کەرکوک پشکی شێری بەرکەوت لە مەینەتیەکانی هاتنی ئەو رێکخراوە تیرۆریستیە بەربەریە و حاڵی حازر قەتماغەی برینەکانی سارێژ نەبوە ، هەروەک پێویستە هەستی بەرپرسیاریەتی بیانجوڵینێت و لەدواساتەکانی دەنگدان بەپرۆژە یاسای هەڵبژاردنی پارێزگاکانی عیراق ، کەرکوک وەک ساڵانی رابردوو بێبەش نەکەن لەم پرۆسەیەو بەتێگەیشتنی هاوبەشی تەوافوقیانە هەموان هەوڵ بدەین لەم دوا هەفتەیەی دەنگداندا پابەندی بەڵێنەکان بن، وە ئەگەر وانەکەن ئەوا پێویستە تەحەمولی هەر دەرەنجامێک بکەن و مێژوویش چاویان لێناپۆشێت.

هەواڵی پەیوەست

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *