shadow

سالار مه‌حمود

له‌ساته‌وه‌ختێكی هه‌ستیارو گرنگدا رێكه‌وتن له‌ نێوان دوو هێزی ركابه‌ردا هاته‌ كایه‌وه‌. ناوه‌ڕۆكی رێكه‌وتنه‌كه‌ به‌له‌به‌رچاوگرتنی بارودۆخی خه‌ڵك و پرۆسه‌ی سیاسیی و ئاینده‌ی كوردستان له‌ رووی ناوه‌ڕۆكه‌وه‌ گرنگ بوو، به‌و مانایه‌ی هه‌ر خاڵێك له‌و بیست و پێنج خاڵه‌ له‌گه‌ڵ پره‌نسیپه‌ نێوده‌وڵه‌تیه‌كانی مافی مرۆڤ و به‌دیهێنانی ئاشتی راسته‌قینه‌و ئۆقره‌یی له‌هه‌مان كاتدا پشت به‌ستن به‌سه‌روه‌ریی یاساو پره‌نسیپه‌كانی دیموكراسی نه‌ك هه‌ر كۆك بوو به‌ڵكو گه‌شه‌پێده‌ریش بوو.

بۆ خودی یه‌كێتیه‌كان و گۆڕانه‌كانیش دوای حه‌وت ساڵ له‌شه‌ڕی ساردو یه‌كتر ته‌خوینكردن و په‌رتكردن و سڕینه‌وه‌ ساته‌وه‌ختێكی گرنگ بوو، بۆ ره‌خساندنی زه‌مینه‌ی ره‌واندنه‌وه‌ی ئه‌و هه‌موو خه‌تی چه‌پ و راست به‌سه‌ریه‌كدا هێنانه‌. ناوه‌ڕۆكی رێكه‌وتنه‌كه‌ هه‌نگاوێك بوو بۆ دروستكرنی فۆرمێكی نوێ له‌ یه‌كڕیزی ناو ماڵی كوردستان . به‌ ڕای من مانه‌وه‌ی رێكه‌وتنه‌كه‌و گه‌شه‌پێدانی به‌میكانیزمی نوێ بۆ جێبه‌جێكردنی ناوه‌ڕۆكه‌كه‌ی بۆ ئه‌م قۆناغه‌ گرنگی زۆری هه‌یه‌ به‌تایبه‌تی له‌م ساته‌وه‌خته‌دا كه‌ كوردستان پێویستی به‌ خۆ كۆكردنه‌وه‌و به‌دیهێنانی ته‌بایی و ئاشتی سه‌رتاسه‌ریی هه‌یه‌ له‌ نێوان هه‌دوو لایه‌ن و لایه‌نه‌كانی تریش به‌تایبه‌تی له‌گه‌ڵ پارتی. چونكه‌ ئه‌ قۆناغه‌ش پێویستی به‌ سازان و پێكه‌وه‌ كاركردن هه‌یه‌ له‌ جیاتی ترازان و په‌رتبوونی ناوخۆیی له‌ ترازاندا دوژمنانی كورد سودمه‌ند ده‌بن ده‌رفه‌تیان ده‌داتێ بۆ ده‌ستخستنه‌ ناو كوردستان له‌ ده‌رگای ترازاوی ماڵی كورد خۆیه‌وه‌، ئه‌مه‌ سه‌ره‌ڕای بوونی ئاماژه‌ی راسته‌قینه‌ بۆ گۆڕانی نه‌خشه‌ی سیاسیی و جوگرافی له‌ ناوچه‌كه‌دا ئه‌ویش به‌هاتنه‌وه‌ی زهێزه‌كانی دونیا بۆ ناوچه‌كه‌ ئه‌مجاره‌یان له‌ په‌نجه‌ره‌وه‌ به‌تایبه‌تی ئه‌مریكا كه‌ پێشبینی ده‌كرێ ئاكامه‌كه‌ی كه‌مكردنه‌وه‌ی هه‌یمه‌نه‌ی وڵاتانی ئیقلیمی بێ به‌تایبه‌تی توركیاو ئێران كه‌ هێشتا سیاده‌ی سنور نازانن و سنوری خۆیان ده‌به‌زێنن. راسته‌ رێكه‌وتنه‌كه‌ هێشتا وه‌ك مه‌ره‌كه‌بی سه‌ر كاغه‌ز ماوه‌ته‌وه‌و زۆر له‌خاڵه‌كانی جێبه‌جێ نه‌بوونه‌ به‌ڵام وه‌ك نه‌خشه‌رَێگا بۆ هه‌ردوو لایه‌ن و بۆ كوردستان بایه‌خی تایبه‌تی هه‌یه‌. خۆ ئه‌گه‌ر هه‌ندێ له‌خاڵه‌كانی ئاسته‌نگی گه‌وره‌یانله‌به‌رده‌م بێ خۆ ده‌كرێ له‌سه‌ر چه‌ند خاڵێكی جدیه‌ت پیشان بدرێت و كار له‌سه‌ر جێبه‌جێكردنی بكرێ. له‌به‌ر ئه‌وه‌ هه‌ر تێڕوانینێك بۆ هه‌ڵوه‌شانه‌وه‌ی رێكه‌وتنه‌كه‌ یا هه‌ڵپه‌ساردنی ده‌بێت به‌ وردی بیر له‌ ئاكامه‌ نێگه‌تیڤه‌كانیشی بكرێته‌وه‌! به‌دروستی نابینم له‌سه‌ر بنه‌مای هه‌ڵچوون و په‌رچه‌ كردار هه‌وڵ بۆ هه‌ڵوه‌شانه‌وه‌ی بدرێ.

وه‌ك چۆن پێویسته‌ پابه‌ند بوون پێیه‌وه‌ بۆ كاتكوشتن و خۆ دزینه‌وه‌ نه‌بێ.

مه‌به‌ستمه‌ بڵێم دوای ساڵێك له‌و رێكه‌وتنه‌ له‌جه‌وهه‌ردا یه‌كێتی و گۆڕانی لێك نزیكنه‌كرده‌وه‌ وه‌ك پێویست و نێوانی لایه‌نه‌كانیشی په‌رتتر كرد، به‌تایبه‌تی پرسی كاراكردنه‌وه‌ی په‌رله‌مانی ته‌عقیدتر كرد كه‌ پارتی لایه‌نی سه‌ره‌كی و بكه‌ری ئه‌ساسیه‌ له‌ كاراكردنه‌وه‌ی په‌رله‌مان وه‌ك چۆن به‌بڕیارێكی حزبی له‌كاری خست له‌كاتێكدا پارتی فراكسیۆنه‌كه‌ی زۆرینه‌شه‌ له‌په‌رله‌مان. گوزه‌رانی خه‌ڵكیش به‌گشتی باش نه‌بوو به‌تایبه‌تیش هه‌ر هیچ نه‌بێ له‌و ده‌ڤه‌ره‌ی كه‌ هه‌ردوو لایه‌ن تێیدا باڵا ده‌ستن.

چاره‌سه‌ر چیه‌؟ ئه‌مه‌ ئه‌و پرسیاره‌یه‌ كه‌ ده‌بێ دوای ئه‌و ماوه‌ زه‌مه‌نییه‌ ببێته‌ بابه‌تی گفتوگۆی راشكاوانه‌و دوور له‌ ده‌ستی ده‌ستپێكردن. گرنگه‌ فتوگۆكان به‌رده‌وام بن و میكانیزمی كرداریی دابنرێت بۆ هه‌نگاو به‌هه‌نگاو بۆ جێبه‌جێكردنی و دۆزینه‌وه‌ی رێوشوێنی پێكهاتنی هه‌ردوو لایه‌ن له‌گه‌ڵ پارتی له‌سه‌ر بنه‌ماكانی ناوه‌ڕۆكی رێكه‌وتنه‌كه‌، چونكه‌ به‌شێك له‌ خاڵه‌كانی رێكه‌وتنه‌كه‌ به‌ یه‌كێتی و گۆڕان به‌ته‌نیا جێبه‌جێ نابن. له‌ رووه‌شه‌وه‌ پێویسته‌ به‌رچاو روونی و به‌ڕاشكاوی بنكه‌ی جه‌ماوه‌ری هه‌ردوو وردتر تێبگه‌یه‌نرێت.

به‌دیدی نوسه‌ر پێویسته‌ زۆرتر كار بۆ جێبه‌جێكردنی ناوه‌ڕۆكی ئه‌و رێكه‌وتنه‌ بكرێت و ببێته‌ به‌رنامه‌ی كرداریی هه‌ردوو لایه‌ن، راسته‌ گه‌نجه‌كانی هه‌ردوو لایه‌ن وكادره‌ پێشكه‌وتووه‌كانی مه‌به‌ستیانه‌ زۆر به‌خێرایی ئه‌وه‌ ببێ كه‌ پێویسته‌ له‌به‌رامبه‌ریشدا زۆرینه‌ی ئه‌ركه‌كه‌ له‌ ئه‌ستۆی سه‌ركرده‌ دێرینه‌كانی هه‌ردوو لا هه‌یه‌ به‌له‌به‌رچاوگرتنی هاوسه‌نگه‌ریی و هاوخه‌باتی دێرینه‌یان ئه‌و وزه‌یه‌ی ماویانه‌ بۆ به‌ره‌و پێشه‌وه‌ بردنی كاروانه‌ هابه‌شه‌كه‌ بینێن نه‌ك زیندوو كردنه‌وه‌ی گرێ مێژوویه‌كانی نێوانیان له‌ شاخ و له‌ناو ململانێكانی رابردوویان له‌ناو یه‌كێتی، ئه‌مه‌ به‌رپرسیارێتیه‌ مێژوویه‌كه‌یه‌ كه‌ له‌ قۆغه‌دا له‌ئه‌ستۆیاندایه‌.

گرفت و كێشه‌ كه‌سیه‌كان نابێ وێنه‌ گه‌وره‌كه‌یان لا بچووك بكاته‌وه‌ ئه‌گینا ده‌رفه‌ته‌كان له‌ده‌ستیان ده‌رده‌چێت و ئه‌و گرێیه‌ی ئێستا ده‌توانرێت به‌ده‌ست بكرێته‌وه‌ ئه‌و كاته‌ به‌تێپه‌ڕبوونی كات به‌ ده‌میش ناكرێته‌وه‌و مێژوو كه‌مو زۆر ئۆباڵی له‌ده‌ستده‌رچوون توند ده‌خاته‌ گه‌ردنیان.

 

هەواڵی پەیوەست

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *