shadow

به‌یانی ئه‌مڕۆ چوارشه‌ممه‌ 31/1/2018 لەیادی چل ساڵه‌ی شه‌هیدکردنی شاسوار جه‌لال ناسراو به‌ ئارام، به‌ئاماده‌ بوونی ژماره‌یه‌ک له‌ سه‌رکرده‌ و هاوخه‌بات و هاوڕێبازی شه‌هید ئارام دیدارێکی تایبه‌ت به‌ قۆناغه‌کانی هه‌ڵکه‌وتنی ئارامی سه‌رکرده‌ له‌ شاری سلێمانی به‌ڕێوه‌ چوو.

وەفدێکی ئەنجومەنی ناوەندی کە پێکهاتبوون لە هەڤاڵانی سکرتارییەت و بەشێکی زۆری ئەندامانی ئەنجومەنی ناوەندی بەشدارییان لەو دیدارەدا کرد، پاشان لە باخی گشتی سلێمانی پەردە لەسەر پەیکەری شەهید ئارام لادرا.

دەقی بروسکەى ماتەمینی ئەنجومەنی ناوەندی بۆ یادی 40 ساڵەی شەهیدبوونی ئارامی سەرکردە :

بەرێزان / بنەماڵە و لیژنەی مەراسیمی یادی شەهیدی سەرکردە (شەهید ئارام)
بابەت / بروسکەی ماتەمینی

دەبا فاشیەکان بزانن وائێستاکە لەکوردستانی ئاراما
لە کوردستانی قەتماغەو کێلگەی زاما، هەر دەوەنە وبن تاشە بەردی چایە
سەنگەرێکە و قوتابخانەی دروستبونی ئارامێکی تری تیایە

سڵاوی خەبات و تێکۆشان…

لە یادی چل ساڵەی شەهیدبوونی (کاک ئارام)ى سەرکردەدا، بە ناوى سکرتاریەت و سەرجەم ئەندامانى ئەنجومەنى ناوەندی یەوە، هاوخەمى و ماتەمینى خۆمان رادەگەیەنین و سەرەخۆشى لە خۆمان و کەسوکار و هاوڕێ و هاوسەنگەرانى دەکەین و باشترین وەفایش درێژەپێدانی رێبازەکەیەتی.

شاسوار جەلال سەعید غەنی ناسراو بە (ئارام) لە بنەماڵەیەکی ئاینی و شۆڕشگێر و نیشتیمان پەروەر چاوی بەدنیا هەڵهێناوە و خاوەن کەسایەتیەکی تایبەت و سەرکردەیەکی ماندوونەناسی رێگای کوردایەتی بوو،هەر لەسەرەتای لاوێتیەوە هەستی نەتەوایەتی و خۆشەویستی بۆ خاک و نیشتیمان لە ناو دڵ و دەرونیدا چەکەرەى کردوە، پاش تەواوکردنی خوێندنی زانکۆ لە بەغدا دەرفەت دەرەخسێنێت کە لە ناوەندە رۆشنبیری و سیاسیەکان نزیک بکەوێتەوە ومشتوماڵی ئایدۆلۆژیا شۆڕشگێرییەکان بکات، پەیوەندیکردنی بە کۆمەڵەی رەنجدەرانی کوردستان بۆ ساڵی 1970یان 1971 دەگەڕێتەوە، لە ساڵی 1972 لە رۆژنامەی هاوکاری وەک نوسەر و رۆژنامەنووس دامەزراوە، لە ساڵی 1975 لە سلێمانی بە چڕی سەرقاڵی کارکردن بووە لە رێکخستنەکانی کۆمەڵەی رەنجدەراندا، لە کانوونی دووەمی 1976 لەگەڵ هاورێکانیدا کۆمیتەیەکیان بەناوی کۆمیتەی هەرێمەکان پێکهێنا، شاسوار جەلال لە شوباتی 1975 راپۆرتێکی سەبارەت بە رەوشی ناوخۆی کۆمەڵە نوسی و تێیدا رەخنەی لە ئەندامانی سەرکردایەتی کۆمەڵە گرت، لەو قۆناغەدا وەک سەرۆکی هەرێمەکان رەفتاری دەکرد، درێژەى بە پەیوەندییەکاندا لەگەڵ دەستەی دامەزرێنەرانی (ی.ن.ک) لە سوریا و هامەهانگی پوختی بۆ جێبەجێکردنی خەباتی چەکداری لە کوردستان هێناوەتەدی، لەوسەروبەندەدا سلێمانی بەجێدەهێڵێ و لە دێهاتەکانی قەرەداغ ژیانی پێشمەرگایەتی دەستپێدەکات.

شاسوار جەلال تەمەنی وەک پێشمەرگە و سەرکردە زۆری نەخایاند و هەزار حەیف و مخابن لە 31/1/1978 لە گوندی تەنگیسەری ناوچەی قەرەداغ بە دەستی جاشەکان شەهیدکرا.

هەزاران سڵاو بۆ گیانى پاکى شەهید ئارامی سەرکردە و سەرجەم شەهیدانى رێگاى رزگارى و ئازادى کورد و کوردستان.

سەر بڵندى و سەر بەرزى بۆ کەسوکارى شەهیدان
سەرکەوتن بۆ گەلى کورد و
هێزى پێشمەرگەى کوردستان


ئەنجومەنی ناوەندی (ى.ن.ک)

هەواڵی پەیوەست

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *