shadow

ئەمرۆ سێ شەممە 28/11/2017 شاندێکی ئەنجومەنی مەڵبەندی کەرکوکی یەکێتیی نیشتیمانیی کوردستان بەمەبەستی گەیاندنی یاداشتننامەیەک لەسەر دۆخی شارەکە سەردانی ئەنجومەنی ناوەندیان کردو لەلایەن هەڤاڵانی سکرتارییەت و ئەندامانی ئەنجومەنی ناوەندی لە سنوری کەرکوک پێشوازی گەرمیان لێکرا.

سەرەتا هەڤاڵ زوبێر عوسمان جێگری سکرتێری ئەنجومەنی ناوەندی لە وتەیەکدا نیگەرانی خۆی بۆ رووداوەکانی کەرکوک دەربڕی و رایگەیاند: ئەوەی لە کەرکوک روویدا دەرئەنجامی سیاسەتی هەڵەی سەرکردایەتی سیاسی کوردستان بوو لەسەر پرسی ریفراندۆم و سوود وەرنەگرتن لە دیدو بۆچوونی دۆست و نەیارانمان لەسەر پرۆسەکە، وتیشی: سەرکردایەتی سیاسی کورد لە هاوکێشە سیاسیەکان تێنەگەیشت و نەیان توانی سوود لە نامەکەی ( ریکس تیلەرسن) وەزیری دەرەوەی ئەمریکا وەک بەدیلی ریفرندۆم وەربگرن، هەروەها نیگەرانی خۆیشی دەربڕی بەرامبەر ئەو هەڵمەتە چەواشەکارییەی بەشێک لە سەرکردە و میدیاکانی پارتی دژی یەکێتی بەردەوام ئەنجامی دەدەن.

پاشان هەڤاڵانی ئەنجومەنی مەڵبەندی کەرکوکی یەکێتیی نیشتیمانیی کوردستان دەستخۆشیان لە ئەنجومەنی ناوەندی کرد کە هەمیشە خاوەن هەڵوێست و بڕیاری بەرپرسیارانە و بوێرانە بوون ، داواشیانکرد لەم قۆناغەشدا بەردەوام بن لەسەر سیاسیەتی پێشوویان و پشتگیری یاداشتەکەیان بکەن کە چارەسەرکردنی کێشەکانی کەرکوکی لەخۆ گرتوە.

داواشیانکرد ئۆرگانە پەیوەندیدارەکانی یەکێتیی نیشتیمانیی کوردستان گرنگی زیاتر بەدۆخی کەرکوک و چارەسەرکردنی کێشە ئیدارییەکانی کەرکوک بدەن و پەلە بکەن لە رێگای بەغداوە پۆستی پارێزگاری کەرکوک بەکەسێکی یەکێتی پڕبکرێتەوە.
هەڤاڵانی ئەنجومەنی مەڵبەندی کەرکوک ئاماژەیان بۆ ئەوەشکرد: لە 16 ئۆکتۆبەردا کەرکومان بەجێنەهێشت بۆ ئەوەی شارەکە وەکو موسڵ و ئەنبار و سەڵاحەدین وێران نەکرێت و هاوڵاتیانی شارەکەش نەبنە قوربانی.

لە کۆتاییدا هەڤاڵانی سکرتارییەتی ئەنجومەنی ناوەندی بەڵێنیان بە مەڵبەندی کەرکوک دا لە نزیکترین کاتدا تاووتوێ و هەڵسەنگان بۆ یاداشتەکەیان دەکەن و ئەوەی پێویست بێت بۆ چارەسەرکردنی کێشەکانی کەرکوک ئەنجامی دەدەین ، دوپاتیشیان کردەوە کە هەمیشە پشتیوانی مەڵبەند و ئیدارە و خەڵکی کەرکوک بوون و لەم بارودۆخەشدا لەگەڵتاندا دەبین و درێژە بە رێبازە پیرۆزەکەی مام جەلال دەدەین.

سەبارەت بە دۆخی ناوخۆی یەکێتیی و بەستنی کۆنگرەش ، هەردولا کۆک بوون لەسەر ئەوەی کە بەزوترین کات یەکێتی نیشتیمانی کوردستان کۆنگرەی خۆی ببەستێت بۆ ئەوەی یەکێتی بەرامبەر پرسە گرنگ و هەستیار و ستراتیژیەکان بڕیاری خۆی بدات.

 

هەواڵی پەیوەست

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *