shadow

ئەمڕۆ ٢٠١٧/١٠/١١ بە مەراسیمێک تێکرای ئەنجومەنی ناوەندی کە پێکهاتبوو لە سکرتاریەت و ئەندامانی ئەنجومەن سەردانی هەواری تازەی سەرۆک مام جەلالیان کردو لەلایەن هەڤاڵ بافڵ تاڵەبانییەوە پێشوازی کران و تاجەگوڵینەی رێزو وەفایان لەسەر گڵکۆی سەرکردەی مەزنی گەلەکەمان داناو سورەتی الفاتحە خوێندرا.
هەر لەو سەردانەدا هەڤاڵ زوبێر عوسمان جێگری یەکەمی سکرتێری ئەنجومەنی ناوەندی لە وتەیەکدا لەسەر گڵکۆی مام جەلال و لەبەردەم جەماوەری زۆری ئامادەبوو رایگەیاند: ”گەورەو رابەرو سەروەرو تاجی سەرمان سەرۆک مام جەلال مامی هەموان، مامی کوردان، مامی گەورەمان. ئەمڕۆ ئەنجومەکەت (ئەنجومەنی ناوەندی) هاتووین بۆ خزمەتت، هاتووین بۆ هەواری تازەت، هاتووین بۆ کۆبوونەوە تا لەگەڵمان کۆببیتەوە، هاتووین تا رێنماییمان بکەیت، هاتووین ئامۆژگارییەکانت لەناو دڵمان بنوسینەوە، هاتووین تا فێری شێوازی نوێی خەباتی کوردایەتیمان بکەیت، هاتووین بۆ ئەوەی فێری تێکۆشان و گیان فیدایی و قوربانیدان و نەبەزینمان بکەیت، بەتێکڕا هاتووین لەدەورت ریزمان بەستووەو پڕ بەدەم دەڵێین بەڵێنی وەفا بۆ مامی گەورەمان دووبات دەکەینەوە، بەڵێنت پێ دەدەین کەلەسەر رێبازەکەت بەردەوام بین کەلەسەر رێبازی خوێنی شەهیدان و رێبازە سەوزەکەی یەکێتیی نیشتمانیی کوردستان بەردەوام بین، هاوار دەکەین و دەڵێین مام نامرێ و لەناو دڵ و دەرونی هەموومان بەزیندووی دەمێنێتەوە.
مامە گیان گەورەیی تۆ، عەقڵی تۆ، دانایی و زانایی تۆ، شارەزایی و لێهاتوویی تۆ، ئەزموون و رابردووی تۆ بۆ ئێمە مەدرەسەیەکی پڕاوپڕ لەزانست و زانیاریت جێهێشتووە کە تادەیان ساڵی تر خزمەتی کۆمەڵانی خەڵکی کوردستانی پێ بکەین، مامە گیان وەکو فێرت کردین ناسرەوین تا سەردەکەوین، مامە گیان یەکێتیی نیشتمانیی کوردستان ئامانەتی بەڕێزتانە ئەنجومەنەکەت هاتووین تا دڵنیات بکەینەوە یەکێتی ناو یەکێتی وەک بیلبیللەی چاومان دەپارێزین و لەهیچ کەسێک لەهەر ئاست و پلەو پایەیەک بێت قبوڵی ناکەین یەکێتی بەلارێدا ببات و لەدوای نەمانی تۆ بۆ مەرامی کەسی خۆی بەکاری بهێنێت، چونکە یەکێتی یەکێتی مامە یەکێتی یەکێتی شەهیدانە، یەکێتی کەسوکاری شەهیدو پێشمەرگە قارەمانەکانە، یەکێتی سەرجەم چین و توێژەکان و خەڵکی کوردستانە.
مامە گیان ئێمەش وەکو ئەنجومەنی ناوەندی بەهێزتر، کاراو کاریگەرتر چاوێری بەرپرسەکان، رەوشی ئۆرگانەکان، نوێنەرانی یەکێتی دەکەین.
مامە گیان تۆ تا لەژیانتا بویت نەحەسایتەوە، چەتری کۆکەرەوەی راوبۆچوونە جیاوازەکان و نەتەوەو ئاینە جیاجیاکان بووی، لەکاتی مەراسیمی ناشتن و پرسەکەشدا کەلەژێر چەتری تۆو لەسەر مێزی پرسەی تۆدا لایەنە ناکۆکەکانی هەرێم، وە لایەنە ناکۆکەکانی نێوان هەرێم و بەغداد کۆبوونەوەو بەڕێزتان لەرابردوو ئێستاو داهاتوو خێرو بەرەکەتی بۆ گەلانی عیراق و گەلی کوردستان و نەتەوەی کورد لەهەر چوارپارچەی کوردستان.
لێرەدا بەپێویستی دەزانم پەیامی ئەنجومەنی ناوەندی بدەم بەسەرجەم ئۆرگانەکان و سەرکردایەتی کە لەئاست گەورەیی مام دابن، لەئاست شکۆی مام دابن، لەئاست گەورەیی خوێنی شەهیدان دابن، لەئاست گەورەیی یەکێتی و ئاپۆڕای جەماوەری کوردستان دابن.
مام زۆر گەورەبوو ئێمەی فێری ئاشتی و ئازادی و دیموکراسی و دادپەروەریی کۆمەڵایەتی کرد، بۆیە دەبێت هەموان لەئاست گەورەیی مام دابین کە مامی کوردو کوردستان و نەتەوەکەمانە، مام سەرۆکێکی نێونەتەوەییە.
لەکۆتایدا.. ماڵئاوا مامی گەورەمان، ماڵئاوا پیاوە مەزنەکە، ماڵئاوا شۆڕەسواری کوردایەتی و مرۆڤایەتی، دڵنیابە خوێندکارەکانت بەردەوامی بەرێبازەکەت دەدەن و رێبازەکەشت تا هەتایە بەردەوام دەبێت.
دوای تەواوبوونی سەردانی گڵکۆی مام جەلال، تێکڕای ئەنجومەنی ناوەندی سەردانی ماڵی مامیان کردو لەوێ لەلایەن دادە هێرۆ و هەڤاڵ بافڵ تاڵەبانی و خانەوادەی مام پێشوازی کران، هەر لەوێش دووبارە سەرخۆشی ئەنجومەنی ناوەندی لەلایەن هەڤاڵ زوبێر عوسمان گەیەندرایە بنەماڵەی سەرۆک مام جەلال.

 

هەواڵی پەیوەست

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *